Pśedsedaŕ Towaristwa za serbsku rěc w cerkwi dr. Hartmut Leipner jo we swójom gronje pokazał na wótwórjony list, kótaryž jo towaristwo napisało ako reakciju na ewaluaciju serbskeje wucby. List ma titel „Śicha tragedija na městnje?“. Za zdaśim Leipnera dej ewaluacija byś „slědne warnowanje“. We lisće stoj mjazy drugim, až doněnta njejo se stała žedna wěcowna analyza rezultatow, a město togo se zjawnje a pśeliš spěšnje pytaju te grěšniki, kótarež deje něnto swóju głowu póchylaś za generelne brachy we systemje. Towaristwo póžeda mjazy drugim modelowu šulu, źož budu se realizěrowaś koncepty k nawuknjenju indigeneje rěcy. Wušej togo njedeje žedne minimnalne licby wuknikow wustawjone byś, a teke wukubłanje wótkubłarjow a ceptarjow dej se staś na měsće, w Bramborskej (ceły list jo wótśišćany na cerkwinem boce).

Leipner jo gronił słowko k Serbskemu sejmoju. Za jogo zdaśim jo to „populistiska akcija, z kótarejuž njejsmy doprědka póstupili a ako žeden problem njejo rozwězała, ale skerjej na škódu była“.

„Ten głažk jo něnto pitśku połnjejšy“