Z Chóśebuza/Cottbus. Jadnomu wjasele, drugemu wobuza: Južo dwójc w slědnych tyźenjach jo se pśiwobrośiła Lausitzer Rundschau wejsnym toflam a drogownikam. Dokulaž su tam rozšyrjali Serbam njetyjuce informacije a su wužywali zmólkatu grafiku, comy se ako serbski Casnik z tym zaběraś.
K prědnemu jo tak, až dajo južo z lěta 2014 wukaz (Erlass) bramborskego kněžarstwa dla dwójorěcnego wutoflowanja. Tam stoj mjaz drugim, až nuznje (zwingend) dejtej se nimske a serbske mě w samskej wjelikosći pismikow wutoflowaś. Měnjone jo to k dobremu Serbow, aby te serbske pismiki njestojali ako te małe slězy.
Prědne take wejsne toflicki stoje južo w Zakrjejcach/Wadelsdorf. Wjas jo se zagmejnowała do Grodka a dlatog jo było nowe wutoflowanje notne. Tofle tam stoje južo wót kóńca 2016 a doněnta njejo to nikogo móliło, až stej serbskej a nimskej mjeni w samskej wjelikosći tam napisanej. Tak jo to Casnikoju wobwěsćił pśisłušny wěcywobźěłaŕ wokrejsa Sprjewja-Nysa Reiner Ohm. Wón teke njewiźi we tych toflach žeden problem.