Dolnoserbska rěc w cerkwi ­– to jo TEN zaměr Towaristwa za spěchowanje serbskeje rěcy w cerkwi. A toś to našo towaristwo swěśi něnto južo swój 25. jubilej.

14. apryla 1994, za mjasec jo to běrtyl stolěśe mimo, su se zmakali serbske kśesćijany a jich pódpěrarje w Dešnje. Tam su toś to towaristwo załožyli.

Głowny zaměr jo był, aby měli jadno towaristwo, kótarež móžo serbskego dušepastyrja pśistajiś. To jo se wót lěta 2002 teke z běrtyl źěłowym městnom stało. Prědny dušepastyŕ jo był Juro Frahnow. Tegdy su dostali pjenjeze ze wšakich žrědłow, mjazy drugim wót Domowiny. Lěto abo dwě lěśe jo to derje tak běžało, ale pótom su te pjenjeze byli wše. Wudroga jo był koncern LAUBAG, kótaryž jo płaśił wjele lět za serbske dušepastyŕstwo.