Z Bórkow/Burg. 13. měrca su swěśili te 17 cłonki Spěchowańskego towaristwa za domowniske stawizny „Stog“ z. t. 15. jubilej załoženja swójogo towaristwa.

11. měrca 2004 su se zgromaźili 12 wobydlarje bórkojskego amta, kótarež se zajmuju za historiske, socialne, kulturelne, sportojske a wuměłske dokumenty z Błotow. Su se rozsuźili je zběraś, pśeslěźiś, wugódnośiś, prezentěrowaś a wózjawiś. K załožarjam towaristwa su słušali dr. Edeltraud Radochla, Rolf Radochla, Siegfried Malk, Susanne Leber, Leander Schurig a Hans-Joachim Kohlase kaž teke te južo zemrěte Měto Šmyt, Friedel Rösler, Siegfried Ramoth a Roland Quos.

Wóni publicěruju domowniski kalendaŕ „Stog“ a w běgu lět su pśemógli dobyś za to wušej hundert regionalnych a domowinskich slěźarjow, awtorow, publicistow, fotografow a wuměłcow. Wušej towzynt pśinoskow, fotow a kreslankow su mógali nazběraś w nagromadu 15 wudaśach „Stoga“.

Tuchylu pśigótuju 16. kalendaŕ „Stog 2020“. Wón dej se w awgusće zjawnosći prezentěrowaś.