Na Serbskem bliźe dnja 6. měrca jo była tema „Žeńska, móc a ewangelska cerkwja“. Gósći stej byłej faraŕka Katharina Köhlerowa a Stefanie Krawcojc. W pśedslědnem wudaśu smy pśedstajili, což K. Köhlerowa jo wulicowała. Źinsa pišomy wót historiskeje situacije žeńskich w ewangelskej cerkwi.

Źinsa jo „faraŕka“ žeńska, ako farari. Dłujko su pak žeńskim fararjow gronili „faraŕki“. To jo zachopiło se pśeměnjowaś, ako žeńske su 1908 w Pšuskej směli na uniwersitach študěrowaś. K tomu jo Bramborski Casnik 1916 pisał: „W Barlinju jo w amerikańskej cerkwi prěny raz žeńska ako faraŕka hustawjona. Nam njoco to se zdaś pšawje byś, pśeto sw. Pawoł groni: Žeńska mjelc w zgromaźińe. Žeńske mógu we wótwardowańu chorych a nuznych dosć a na dosć swoju lubosć k Jezusu pokazaś.“