Z Chóśebuza/Cottbus. Rěcny centrum Witaj jo srjodu tyźeń na póžedanje dolnołužyskeje župy pśewjadł we kafateriji Dolnoserbskego gymnaziuma njezjawnu kubłańsku klawzuru. Góźba k tomu jo nastała pśez ewaluaciju serbskeje wucby w zakładnych šulach. Jeje konkluzija ga jo: Něntejšne pilnowanja njenjasu te płody, ak by trjebne byli za wuchowanje dolnoserbskeje rěcy ako aktiwnje powědaneje rěcy. Wótglědanje klawsury jo było se zaběraś z rezultatami ewaluacije, wósebnje což nastupa Witaj-wucbu.

RCW jo pśepšosył wjelich, ak we głownem abo cesnem amśe se na tom pólu angažeruju: pśedsedaŕstwo dolnołužyskeje Domowiny, zwězkowe pśedsedaŕstwo Domowiny, Serbsku radu, Towaristwo za serbsku rěc w cerkwi, zagronite za serbske nastupnosći, Maśicu Serbsku, wše serbske institucije a redakcije w Dolnej Łužycy, kaž teke Institut za sorabistiku z Lipska. Wušej 40 luźi jo se wobźěliło.