Z Cerkwice/Zerkwitz. Jatšownicu jo 17 rejtaŕkow a rejtarjow 22. raz (w nowem casu) zapowěźeli wjasołu powěsć górjejstawanja Kristusa we jsach wósady Lubnjow-Nowe Město. Towzynty woglědari su se tu śichu procesiju woglědali. Wěcej ako 1.600 strusackow naźeje su rozdźělowali na luźi, ako su cakali.

Mjaztym słuša k tradiciji wósadneje rady, rejtarjow jatšownicu zeger źaseśich posłaś wót cerkwje do wokołnych jsow. Jadnab 500 luźi jo pódla było, ako konfirmandy su pśepódali běłe chórgoje ze cerwjeneju kśicu na Wolfganga Philippa z Kśimnic a Skolojc Christinu z Groźišća (Gröditsch). Wjele pśibytnych źowćow a žeńskich jo se woblekało serbsku drastwu. Zelenu kśicu naźeje z bužboma su pśepódali na rejtarce Burišojc Juliane z Rogowa (Ragow, powědaŕka rejtarjow) a na Wittichojc Janette.