Žylow jo wót jatš bogatšy wó jaden nowy chrom. To jo dnjowna wótwardowaŕnja za stare, chrome a chamne. Z pomocu žylojskich rucnikaŕskich firmow stej ju natwariłej dwa twaŕskej kněza: Denis Końcak a Daniel Tatan. Naprěki cerkwje, kradu tam, źož we 1960tych lětach jo stojała Schmidtojc knajpa.

Nowy chrom ma dwě etažy. Zwjercha jo pěś modernych bydlenjow, ku kótarymž pśiźoš z liftom abo pó wenkownej trepje. Dołojce su wjelike śpy za wótwaŕdowanje chórych a chamnych. Stare luźe njemuse stakim ceły źeń doma we swójich styrich sćěnach zawrěte byś.

Wótwardowarje staraju se ceły źeń, aby jich gósći měli wótměnjatu zaběru. K tomu słušaju graśa, lažke turnowanje a trening spomnjeśa. A teke kontakty do jsy dajo. Faraŕka Katharina Köhlerowa jo zlubiła, až buźo ze seniorami spiwaś a teke nabóžniny źaržaś.