Wurězk kórty Žagańskego kněstwa ze 17. stolěta. Na njej su namólowane jogo eksklawy w Dolnej Łužycy (zelene wobcerjenja). Ta nejdalej k pódwjacoru lažeca eksklawa wopśimjejo Błobošojce/Bloischdorf. 
Z Błobošojc/Bloischdorf. Pśed žednymi tyźenjami jo katolski zgórjelski biskup Wolfgang Ipolt wuswěśił tudsku cerkwju swětego Josepa, pó jeje saněrowanju. Błobošojska cerkwicka jo kradu wósebna: Wóna jo ta jadna sama katolska wejsna cerkwja w serbskej Dolnej Łužycy.
Natwarili su ju we 14. stolětu z pólnych kamjenjow a bryły (Raseneisenstein). A snaź jo wóna hyšći starša, ale to njejo kradu wopokazane. Stakim jo to nejstarša wejsna cerkwja we starem Grodkojskem krejzu. Wóna, kaž teke cerkwje w Bukowje (Groß Buckow), Jasenju (Jessen), Łojowje (Groß Luja), Syjku (Graustein), Tšadowje (Stradow) a Lěšćach (Hornow), su słušali pśed reformaciju do katolskeje parochije w Grodku.
