Wót 5. do 9. maja jo Serbske šulske towaristwo organizěrowało busowy wulět pód napismom Pó słowjańskich slědach we Wendlanźe. Organizatory jězby su byli źiwadłownik Měrćin Krawc, pśedsedarka SŠT Ludmila Budarjowa a casnikaŕ a muzejownik Werner Měškank ako znajaŕ historije togo regiona, pśewažna wětšyna wobźělnikow jo była z Górneje Łužyce.

Program wěcejdnjojskego wulěta jo był wjelgin wobšyrny. Wobźělniki su woglědali žedne kulojcowe (Rundlings-) jsy a wuznamne cerkwje regiona. Mjazy drugim su wobźiwowali kapałku Lübbow a rozwaliny cerkwje w Spithalu, w kótarymaž dajo se zwěsćiś wósebny zwisk do casa srjejźnego wěka, ako su how sedlili słowjańske Drjewjanarje. Wótergi su se bóže domy w casu kśesćijanizacije połobskich Słowjanow twarili na městnach, źož jo se něga woplěwał kult tatańskich pśibogow.