Zły Komorow/Senftenberg. W Serbskej cerkwi w Złem Komorowje, w Domje bergarjow, jo swěśiło 28. julija 80 namšaŕkow a namšarjow zbliska a zdaloka 10. jubilejnu serbsko-nimsku namšu. Namša jo była zgromadnje z cerkwinym chorom katolskeje górnoserbskeje wósady Chrósćicy pód nawjedowanim dirigenta Michała Cyža.

Iniciator a organizator namšow, Günter Pawliš, jo wšyknych wutšobnje wuwitał. Wósadny faraŕ Manfred Schwarz jo pśewzeł liturgiju w serbskej a nimskej rěcy, faraŕ n. w. Dieter Schütt jo we wobyma rěcoma prjatkował wjelgin naglědniwje a troštnje wó tom, až njedej se luź starosćiś wó pśiducy źeń, ale z dowěru we Boga pśiwześ kuždy nowy źeń a wjacor wšykno statkowanje zasej do Bóžych rukow scyniś. Namšy cytali su Hanka Markec, Madlena Norbergowa a Christiana Piniekowa a namšu na klawěrje pśewóźował jo Dieter Gebauer. Z mócnym pśiklaskom su namšarje a namšaŕki mytowali kšasne spiwanje 20 cłonkow chora.