Njeźelu, 8. decembra, jo Měto Pernak zamrěł. Zgubijomy z nim jadnogo Serba, kenž jo se wjelebocnje za swój lud angažěrował, a to z dalokego Barlinja, źož jo z familiju bydlił.

Wuzwignuś dej se jogo 13-lětne statkowanje ako pśedsedaŕ Maśice Serbskeje. Wón jo załoženje togo serbskego wědomnostnego towaristwa w Dolnej Łužycy 1993 głownje sobu iniciěrował, kenž wobogaśijo až do źinsajšnego serbske kulturne žywjenje. Wósebnje wažne jo jomu pśi tom žurnem źěle było, až jadnory serbski lud na jsach namakajo zasej pśistup k swójim serbskim kórjenjam. Z drugimi jo pócesćił wósobiny serbskego kulturnego žywjenja a jim tam, źož su se naroźili abo statkowali, gódny pomnik stajił. Wuzwignuś dej se pomnik za rěcywědnika Mjertyna Monja w Turnowje, spomnjeńskej tofli za mólarja Fryca Latka w Nowej jsy a za awtora prědnych śišćanych serbskich knigłow Albina Mollera w Tšupcu. Za to a dalšne aktiwity jo se wón w lěśe 2008 cesćił ako cesnego cłonka Maćicy/Maśice.