Z Kórjenja/Kahren. Až Matthias Scheufele jo nowy wjednik cerkwinskego „Centruma za dialog a změnu“ (Zentrum für Dialog und Wandel), smy južo pisali. Tśeśi adwent, 15. decembra, jo generalna promštowka Theresa Rineckerowa jogo zawjadła do togo amta, na namšy w Nimskej cerkwi.

Faraŕ Matthias Scheufele (62) co pśewóźowaś luźe, pšosyś na dialog a gromadu wjasć šćitarje wobswěta, pśiwisniki a pśeśiwniki brunice. Pšawje zachopiś źěłaś buźo 1. januara, pśewzeł jo ten amt ako wjednik „Centruma za dialog a změnu“ južo 1. decembera. (Centrum financěrujotej krajna cerkwja EKBO a te styri łužyske cerkwine wokrejse we tej krajnej cerkwi. To źěło jo za njogo wobgranicowane na pěś lět, to groni až faraŕ Scheufele buźo pśestaś, gaž se tak a tak sednjo na wuměńk. Wón groni: „Cu blisko luźam byś a je pśewóźowaś w komplicěrowanem casu strukturoweje změny. Mě njejźo wó politiske cele.“