W lěśe 2019 jo serbske wědomnostne towaristwo Maćica Serbska wóspjet wupisało Maśicne myta, za dolnoserbske gymnaziasty a gymnaziastki jo to Myto Bogumiła Šwjele. To myto su pósćili Isabelle Grätzojc. Jennifer Kretšmarojc jo jadna tych młodych luźi, ako jo spěchowańske myto dostała, a to za swójo źěło wó Matu Kosyku. Z njeju jo se Stefanie Krawcojc rozgranjała.

Nowy Casnik: Jennifer, ceja sy?

Som Jennifer Kretšmarojc, ja bydlim w Chmjelowje. Lětosa som złožyła abituru na Dolnoserbskem gymnaziumje (DSG).

Sy dostała spěchowańske myto. Co jo była tema?

„Das Leben und Wirken Mato Kosyks in Deutschland und Amerika“. To som pisała w seminarnem kursu stawizny pla Angele Šurmanoweje. Kurs jo běžał w 11. a 12. lětniku. Wóna ceptaŕka jo mójo źěło zapódała pla Maćice Serbskeje, ako procowanje wó Myto Bogumiła Šwjele. Za Kosyka ako temu som se rozsuźiła, dokulaž literatura mě zajmujo. Pśi rešeršach som wšake zgóniła, co jo se tšojło w jogo žywjeńskem casu.

Co dokradnje měniš?