Z redakcije/Die Redaktion. Stefanie Krawcojc buźo wot 1. januara 2021 šefredaktorka Nowego Casnika. Za nju jo se wjednistwo Ludowego nakładnistwa Domowina w Budyšynje, ku kotaremuž redakcija nejstaršych nowin w Dolnej Łužycy słuša, pó dokradnem wuzwóleńskem procesu rozsuźiło. Stefanie Krawcojc pśewzejo městno wót dr. Viktora Zakarja. Wón jo funkciju nachylu pó wótchójźenju Gregora Wieczoreka kóńc apryla pśewzeł a wugbajo ju hyšći až do kóńca lěta.

45lětna z Janšojc póchadajuca Chóśebuzaŕka jo pó abiturje na Dolnoserbskem gymnaziumje na Humboldtowej uniwersiśe w Barlinju a na mjeńšynowej uniwersiśe Åbo akademi we Finskej nowe a nowše stawizny, nowu nimsku literaturu a skandinawistiku studěrowała. Južo wót lěta 2004 jo maminorěcna Dolnoserbowka ako licha awtorka redakciju Nowego Casnika zmócnjała. Wót lěta 2014 jo wóna w redakciji pśistajona redaktorka a jo se w slědnych šesć lětach wobšyrnu redakcisku praksu pśiswójła.