Z Chóśebuza/Cottbus. Pśedsedaŕstwo Spěchowańskego towaristwa za serbsku rěc w cerkwi (STSR) jo na pósejźenju pónjeźele, 9. nowembra, wobzamknuło, až lětosa žedna zgromaźina cłonkow njebuźo. Něntejšna strowotniska situacija njedajo wobpšawiś take zmakanje. Spócetnje jo kśěło towaristwo nowe Serbske wósadne zmakanišćo w Chmjelowje z namšu a ze zgromaźinu na pśedwjacorje prědnego adwenta oficialnje pśedstajiś. Pśedwiźony nowy termin jo něnto 6. februara 2021, jolic korona-póstajenja to dowóliju.

Pśedsedaŕstwo jo pśiwzeło na pósejźenju młodeju noweju cłonkowu. Dalšne temy wobradowanja su byli situacija serbskego dušepastyŕstwa a planowanja za pśiduce lěto. Ku gódam wujźo dalšne wudaśe serbskego cerkwinego łopjena „Nowy wósadnik“ ze wšyknymi terminami. Dypkownje k nowemu cerkwinemu lětoju stoj teke woblubowany dwójorěcny plakat z gronkom lěta k dispoziciji. Wažny termin w lěśe 2021 jo 100. jubilej zwónow dešańskeje cerkwje, kenž se 2. maja swěśi z namšu. Bogumił Šwjela jo ako wósadny faraŕ w Dešnje póstark dał, až wšykne zwóny maju jano serbske napisma.