K listoju Siegfrieda Malka „Jatšowne spiwanje njej ‚wusnuło‘!“ w Nowem Casniku 15/2021 jo dojšła reakcija:

Siegfried Malk jo w medijach cytał, až jatšowne spiwanje by raz „wusnuło“, což njama za wěrno. Tomu ja pśigłosuju. Wón pśidajo pśikłady, až někotare policisty abo cłonki LNM (FDJ) su ten serbsko-nabóžny nałog w 1950ych lětach kazyli. Citat Otta Grotewohla (wót 1918 cłonk USPD respektiwnje SPD, wót 1945 cłonk SED a wót 1949 až do 1960 ministaŕski prezident DDR) w lazowaŕskem lisće pokažo, až su byli take kazece akcije statkowanja regionalnych akterow pó swójej wóli. Jo ga znate, až nowy stat pód wjednistwom SED wót lěta 1949 jo ako prědny nimski stat w stawiznach serbsku wucbu pódpěrował a mimo togo cerkwju tolerěrował. How se togodla góźi, na dalšne aspekty wopśestaśa jatšownego spiwanja glědaś.