Namša pód gołym njebjom 2021 w Depsku

Až do lěta 2019 jo była namša pód gołym njebjom na Majberku rědna tradicija za kśesćijanow wósady Serbskeje cerkwje w Chóśebuzu. Jadnab 200 luźi jo se how gromaźiło, teke Dešańske, Majberske, Depšćańske a Picańske su stupny stwórtk pśišli. Cesto su byli jich kólasa pyšnjone z lebinami. Dla wobgranicowanja w zwisku z koronu jo to zmakanje južo łoni była hynakša wěc, źož su se wósadniki wudali na kólasowu „gwězdowu turu“. Ta tura jo namakała dobry wótgłos, ako radna licba wobźělniki jo pokazała.

Lětosa jo stupny stwórtk zasej była zgromadna namša pód gołym njebjom. Hynac jo było, až njejsu se luźe zgromaźili na Majberku, ale w Depsku. Tamkol mjazy damom a Sprjewju, pśi depšćańskem móstu, jo faraŕ Gürtler rozkładł tu změnu městna. Rozmjej: Na městnje na Majberku stoj něnto płot, kenž dej te wjelki wótwoboraś. To wósada zawěsće respektěrujo., ale: „Njocomy někakego płota dla se zbyś našeje tradicije na stupnem stwórtku a smy pytali, źo hynźi móžomy wence namšu swěśiś. Jo rědnje wiźeś, až telik luźi jo pśichwatało, lěcrownož jo skerjej chłodno, a lěcrownož se pada!“