Dnja 19. a 20. junija swěśe ewangelske Serby w Mósće 75. Serbski ewangelski cerkwiny źeń. Jubilej jo góźba, do historije kuždolětnego zmakanja glědaś.

Prědny raz we Wórjejcach

Ta mysl jo se naroźiła w pówójnskim casu we Wórjejcach, źož jo był prědny serbski cerkwiny źeń 3. nowembra 1947, aby se cerkwino-politiske nastupnosći rozpowědali. Jo šło wó wózroźenje serbskego cerkwinego žywjenja w sakskej a šlazyńskej cerkwi, wósebnje wó kazniske rědowanje, wó natwaŕ serbskich cerkwinych strukturow a wó wobsajźenje wósadow ze serbskimi fararjami. Ceło w znamjenju tych zaměrow jo stojał teke drugi cerkwiny źeń 26. maja 1948 w Bukecach (Hochkirch). Tam jo se krajny biskop Hahn wobźělił a Serby, pódpěrane wót pśedsedarja Domowiny Pawoła Neda, su jasne pominanja na cerkwinu wušnosć w Sakskej stajili. Wuspěchy pówójnskich procowanjow su skóro slědowali: 1949 jo se wobzamknuła serbska cerkwina kazń w sakskej krajnej cerkwi a na tśeśem cerkwinem dnju w Njeswačidle jo se Bukečanski faraŕ Gustaw Mjerwa ako serbski promšt zapokazał. Pódobny serbska kazń jo 1951 slědowała w šlazyńskej cerkwi.