Z Města/Cottbus. Na dnju 76. wrośenice chyśenja atomoweje bomby 6. awgusta na japańske město Hiroshima jo se w Měsće wótekšył pśed Bramborskeju galeriju, něgajšnem Wóseckem dwórnišću/Großenhainer Bahnhof, pśi połnocnem wuchoźe Głownego dwórnišća měrowy pal (Peace pole/Friedenspfahl). Pal jo z japańskim, engelski m, nimskim a prědny raz tež ze serbskim napismom wugótowany pó bibliskem gronje (Lukas 2, 14) Daś buźo měr na zemi. Iniciatiwu za póstajenje pala jo měła měsćańska kupka partaje Lěwica, tak jo wuzwignuł w swójich witańskich słowach jeje pśedsedaŕ Christopher Neumann, kenž jo witał na zarědowanju teke českich partnarjow. Pśed wótekšyśim jo wušy šołta Holger Kelch (CDU) w swójom nagronje wuzwignuł, až měr a jogo zachowanje njejo partajopolitiska tema, togodla stoj we tom pšašanju tež gromaźe z měsćańskeju Lěwicu. Hagen Stoletzki, pśedewześaŕ w měsće a pśijaśel Serbow, jo ako zastupnik Towaristwa měrowych zwónow Barliń (Friedensglockengesellschaft) witał pśibytnych na serbski, česki a nimski. Towaristwo jo pódpěrowało póstajenje pala.