Trjebin/Trebendorf. W Trjebinje a Miłorazu wugbaju wognjowe woborniki wjele statkow k lěpšemu zgromadnosći a k lěpšemu wejsneje kultury. To jo se wuznało z jich grona na wobradowanju gmejnskeje rady stwórtk pśed dwěma tyźenjoma. „Wšykne serbske tradicije wognjowa wobora pódpěra abo sama organizěrujo: wót camprowa-nja, pśez zapust (reju) až k stajanju majskego boma“, jo wulicował wjednik trjebinskeje wobory Bernd Kowalik (Kowalick). Za jogo woborniki jo to cesć a nastupnosć wutšoby.

Tuchylu maju w trjebinskej dobrowólnej woborje nagromadu 43 kameradow. 32 su aktiwne, 11 we wótźělenju za starše a cesne cłonki. Teke pěś žeńskich maju we swójich rědach. 11 wuknikow pśisłuša młoźinskemu wótźělenju. Pód wjednistwom Jensa Mäckelburga a wjednice młoźiny Francy Gärtig gótujo wognjowa wobora solidne młoźinske źěło, ak jo załožone na dłujki cas. Cesto jo młoźinska wobora wobźělona na wuběźowa­njach. Wjele pokalow su južo dobyli.