Ze Slěpego/Schleife. Dnja 6. oktobra jo Serbski folklorny ansambel w Slěpem wšykne aktiwne kaž tež něgajšne cłonki pšosył na tradiciske zmakanje do zala Serbskego kulturnego centruma w Slěpem. Góźba jo była jubilej 45. wobstaśa.

Wjacor jo wopśimjeł wšake wjeraški. Tam su wucesćili Wolfganga Kotiseka, kótaregož jo zwězkowy prezident zachopjeńk lěta pócesćił, a Alenu Kubankovu. Slědna wót njeju jo lětosa dostała myto Domowiny a jo wjele lět źěłała ako wjednica ansambla a choreografowka. Za wobeju su pśibytne spiwali „Sławu“ sobotu wjacor. Taki jubilej jo radna góźba, na zachadne casy slědk glědaś. Tak su se na to spominali, kak ansambel jo w lěśe 2015 był wuzwólowane ako „Towaristwo lěta“ wót Pódzajtšnosakskego zwězka žarjabnicow (Ostsächsischer Sparkassenverband. Nastał jo toś tom ramiku image-film. Jen su se gósći togo wjacora z wjelikim zajmom woglědali.

Lěc cłonki towaristwa se wuznaju, su testowali z kwisom. Tam su pšašali wšake wó historiji ansambla w slědnych 45 lětach, a teke wó powšyknej serbskej tematice.