Z Wjerbna/Werben. Jadnab 200 luźi jo pśišło na woklapnicu do kjarcmy „Ku gwězdźe“, źož gmejnska rada, wobstojeca ze 13 raźcow, pód wjednistwom šołty Joachima Diekego (CDU) jo prezentěrowała dobru bilancu zachadnego lěta. K wjerbańskej gmejnje słušaju jsy Rubyn, Wjerbno a Brama.

K prědnemu: we gmejnje se wjele twari, to jo pozitiwna wěc. Moderne domy za familije nastawaju abo se pśetwarjuju. Drogi se wótnowjaju. Grajnišćo za źiśi jo se pówózyło z kisom. Ławki a blida za turisty su se wótnowili a gałuzy na bomach zwótrězowali, aby awtojězdźarje lěpjej drogu wiźeli.

To pśeśěgnjenje bórkojskeje źiśownje nachylu do Wjerbna jo se spóznało za dobre a wužytne. Šołta jo se wjaselił, až tśi wětše pśedewześa we jsy wuwucuju wucbniki a jich naslědku ako fachowe źěłaśerje pśistajiju.

We pśiducych tyźenjach buźo se twariś nowy móst pśez Połnocny kanal do Smogorjowa, a teke to pśetwarjenje šule do źiśownje buźo se dalej wjasć.